ਸੁਪਨੇ ਵੇਖੋ ਸਫ਼ਲ ਬਣੇ

ਇਕ ਗਰੀਬ ਮਨੁੱਖ ਅਮੀਰ ਹੋ ਜਾਣ ਦਾ ਸੁਪਨਾ ਵੇਖ਼ਦਾ ਹੈ ! ਇਕ ਕੁਵਾਰੀ ਕੁੜੀ ਆਪਣੇ ਸੁਪਨਿਆਂ ਦੇ ਰਾਜਕੁਮਾਰ ਨਾਲ ਵਿਆਹੇ ਜਾਣ ਦਾ ਸੁਪਨਾ ਵੇਖਦੀ ਹੈ ! ਇਕ ਵਿਦਿਆਰਥੀ ਪ੍ਰੀਖਿਆ ਵਿਚ ਅਵਲ ਆੳਣ ਦਾ ਸੁਪਨਾ ਵੇਖਦਾ ਹੈ ! ਇਕ ਹੇਠਲੇ ਦਰਜੇ ਦਾ ਕਰਮਚਾਰੀ ੳੱਚ ਅਧਿਕਾਰੀ ਬਣ ਜਾਣ ਦਾ ਸੁਪਨਾ ਵੇਖਦਾ ਹੈ! ਇਕ ਅਪਾਹਜ਼,  ਸਰਬਕਲਾ ਸਮਰੱਥ ਮਨੁੱਖ ਬਣ ਜਾਣ ਦਾ ਸੁਪਨਾ ਵੇਖਦਾ ਹੈ ! ਸੁਪਨੇ ਵੇਖਣ ਵਾਲੇ ਬੇਅੰਤ ਲੋਕ ਹਨ, ਪਰ ਦੁਨੀਆ ਸੁਪਨੇ ਵੇਖਣ ਵਾਲਿਆਂ ਦਾ ਮਖੌਲ ਉੜਾਂਉਂਦੀ ਹੈ ਅਤੇ ਉਹਨਾਂ ਨੂੰ ਸ਼ੇਖ਼ਚਿੱਲੀ ਅਤੇ ਮੁੰਗੇਰੀ ਲਾਲ ਵਰਗੇ ਨਾਂਵਾਂ ਨਾਲ ਸੁਭਾਇਮਾਨ ਕਰਦੀ ਹੈ.......  ਤਾਂ ਕੀ ਇੰਜ ਸੁਪਨੇ ਵੇਖਣਾ ਬੁਰੀ ਗੱਲ ਹੈ ??
ਅਸਲ ਵਿਚ ਸੁਪਨੇ ਵੇਖਣਾ ਬਿਲਕੁਲ ਵੀ ਗਲਤ ਗੱਲ ਨਹੀਂ ਹੈ! ਸੁਪਨੇ ਹੀ ਉਰਜ਼ਾ ਦੇਣ ਵਾਲੇ ਉਹ ਸਰੌਤ ਹਨ, ਜਿਨ੍ਹਾਂ ਨਾਲ ਮਨੁੱਖੀ ਜੀਵਨ ਸਫ਼ਲ ਹੁੰਦਾ ਹੈ ! ਸੁਪਨੇ ਮਨੁੱਖ ਦਾ ਕ੍ਰਮਵਾਰ ਵਿਕਾਸ ਕਰਦੇ ਹਨ ! ਜ਼ਿੰਦਗੀ ਵਿਚਅਸੀਂ ਜਿਸ ਮਕਸਦ ਜਾਂ ਵਸਤੂ ਨੂੰ ਪਾਉਣ ਲਈ ਤੜਫਦੇ ਹਾਂ,  ਉਸ ਨੂੰ ਸਾਕਾਰ ਰੂਪ ਵਿਚ ਪਾਉਣ ਦਾ ਸੁਪਨਾ ਵੇਖਦੇ ਹਾਂ ! ਪਹਿਲਾਂ ਅਸੀਂ ਆਪਣੇ ਖਿਆਲਾਂ ਵਿਚ ਉਸ ਦੀ ਕਲਪਨਾ ਕਰਦੇ ਹਾਂ , ਫਿਰ ਓਸ ਤਕ ਪਹੁੰਚ ਬਣਾ ਲੈਣ ਦੀ ਵਿੳਂਤ ਬਣਾਉਂਦੇ ਹਾਂ ! ਇਸ ਲਈ ਸੁਪਨੇ ਹੀ ਸਾਡੀ ਸੱਚੀ ਪ੍ਰੇਰਕ ਸ਼ਕਤੀ ਹਨ !
ਵਿਸ਼ਾਲ ਆਕਾਰ ਦੇ ਸਮੁੰਦਰੀ ਜਹਾਜ, ਅਦਭੁੱਤ ਸੁਰੰਗਾਂ , ਵਿਰਾਟ ਪੁਲ,  ਸਜੀਲੇ ਸਕੂਲ,  ਯੂਨੀਵਰਸਿਟੀਆਂ,  ਵੱਡੇ-ਵੱਡੇ ਹੋਟਲ ਹਸਪਤਾਲ,  ਲਾਇਬ੍ਰੇਰੀਆਂ , ਆਵਾਜਾਈ ਦੇ ਸਾਧਨ,  ਅੰਤਰਰਾਸ਼ਟਰੀ ਨਗ਼ਰ,  ਸੰਚਾਰ ਅਤੇ ਮਨੋਰੰਜਨ ਦੇ ਭੰਡਾਰ,  ਜ਼ਿੰਦਗੀ ਜਿਉਣ ਦੀਆਂ ਤਮਾਮ ਸਹੂਲਤਾਂ,  ਸੁੱਖ ਦੇ ਵਿਗਿਆਨਕ ਸਾਧਨ ਆਦਿ ਕਿਸੇ ਨਾ ਕਿਸੇ ਸੁਪਨੇ ਵੇਖਣ ਵਾਲੇ ਦੇ ਸੁਪਨਿਆਂ ਦਾ ਹੀ ਫਲੀਭੂਤ ਹੋਇਆ ਮਿੱਠਾ ਫਲ ਹੈ ! ਜੇ ਸੁਪਨਸਾਜ਼ ਨਾ ਹੁੰਦੇ ਅਤੇ ਆਧੁਨਿਕ ਯੁੱਗ ਦੇ ਸੁਪਨੇ ਨਾ ਵੇਖਦੇ ਤਾਂ ਅੱਜ ਜੋ ਸੱਭਿਅਤਾ , ਤਰੱਕੀ ਸਾਂਨੂ ਵਿਖਾਈ ਦੇ ਰਹੀ ਹੈ , ਉਸਦਾ ਕਿਤੇ ਨਾਮੋਨਿਸ਼ਾਨ ਹੀ ਨਾ ਹੁੰਦਾ !
ਇਕ ਵੀ ਇੱਟ ਜਾਂ ਪੱਥਰ ਰੱਖੇ ਬਿਨਾਂ ਭਵਨ, ਇੰਜਨੀਅਰ ਦੀ ਕਲਪਨਾ ਵਿਚ ਪਹਿਲਾਂ ਹੀ ਤਿਆਰ ਹੁੰਦਾ ਹੈ ! ਸਫ਼ਲ ਕਾਰੋਬਾਰੀ ਸੁਪਨੇ ਵਿਚ ਆਪਣਾ ਸਾਮਾਨ ਵੇਚ ਚੁਕਿਆ ਹੁੰਦਾ ਹੈ , ਵੇਚਣ ਦੇ ਰਾਹ ਵਿਚ ਆਈਆਂ ਉਲਝਣਾਂ ਉਹ ਵੇਚਣ ਤੋਂ ਪਹਿਲਾਂ ਹੀ ਸੁਲਝਾ ਚੁਕਿਆ ਹੁੰਦਾ ਹੈ ! ਇਸੇ ਤਰ੍ਹਾਂ ਇਕ ਫਿਲਮ ਨਿਰਦੇਸ਼ਕ ਆਪਣੀ ਫਿਲਮ ਨੂੰ ਨਿਰਦੇਸ਼ਤ ਕਰਨ ਤੋਂ ਪਹਿਲਾਂ ਉਸਦੀ ਪੂਰੀ ਕਹਾਣੀ ਨੂੰ ਆਪਣੇ ਮਨਸ-ਪਟਲ 'ਤੇ ਕਲਪਿਤ ਲੋਕ ਵਿਚ ਚਿਤਰਿਤ ਹੁੰਦੇ ਵੇਖਦਾ ਹੈ ਅਤੇ ਉਸ ਦਾ ਜਿਉਂ ਦਾ ਤਿਉਂ ਸੁਪਨਾ ਲੈਂਦਾ ਹੈ , ਉਸਨੂੰ ਆਪਣੇ ਅਕਸ ਵਿਚ ਢਾਲਦਾ ਹੈ ! ਫੇਰ ਉਸਨੂੰ ਸਿਨਮਾ ਦੇ ਪਰਦੇ 'ਤੇ ਪੇਸ਼ ਕਰਦਾ ਹੈ !
ਸਾਰੇ ਮਹਾਨ ਕਾਰਜਾਂ ਪਿੱਛੇ ਸੁਪਨਿਆਂ ਦੀ ਖ਼ਾਸ ਭੂਮਿਕਾ ਹੁੰਦੀ ਹੈ ! ਗਲੀਲੀੳ ਅਤੇ ਕਈ ਹੋਰ ਮਹਾਨ ਵਿਗਿਆਨੀਆਂ ਨੂੰ ਜਿਨ੍ਹਾਂ ਨੂੰ ਸੁਪਨਿਆਂ ਲਈ ਕਈ ਤਰ੍ਹਾਂ ਦੀਆਂ ਸਜਾਂਵਾਂ ਭੁਗਤਣੀਆਂ ਪਈਆਂ,  ਉਹੀ ਸੁਪਨੇ ਕੁੱਝ ਵਰਿਆਂ ਬਾਅਦ 'ਵਿਗਿਆਨ' ਦੇ ਨਾਂਅ ਨਾਲ ਜਾਂਣੇ ਅਤੇ ਮੰਨੇ ਗਏ! ਗਲੀਲੀੳ ਨੇ ਸਾਨੂੰ ਪੁਲਾੜ ਅਤੇ ਧਰਤੀ ਸੰਬੰਧੀ ਵਿਗਿਆਨ ਤੋਂ ਜਾਣੂ ਕਰਵਾਇਆ! ਰਾਈਟ ਬੰਧੂ ਹਵਾਈ ਜਹਾਜ਼ ਉਡਾਉਣ ਦਾ ਸੁਪਨਾ ਵੇਖਦੇ ਸਨ! ਕੌਲੰਬਸ ਸਮੁੰਦਰ ਪਾਰ ਇਕ ਹੋਰ ਧਰਤੀ ਹੋਣ ਦਾ ਸੁਪਨਾ ਵੇਖਦਾ ਸੀ ! ਕੌਲੰਬਸ, ਇਸ ਸੁਪਨੇ ਦੇ ਕਾਰਨ ਹੀ ਅਮਰੀਕਾ ਦੀ ਖੋਜ ਕਰਨ ਵਿਚ ਸਫ਼ਲ ਹੋਇਆ!
ਕਨਫਿਊਸ਼ੀਸ਼ , ਸੁਕਰਾਤ ਅਤੇ ਬੁੱਧ ਦੇ ਸੁਪਨੇ ਅੱਜ ਕਰੌੜਾਂ ਲੋਕਾਂ ਦੇ ਜੀਵਨ ਵਿਚ ਅਸਲੀਅਤ ਬਣ ਚੁੱਕੇ ਹਨ!  ਜ਼ਾਰਜ਼ ਸਟੀਵੇਨਸਨ ਇਕ ਕੋਇਲੇ ਦੀ ਖਾਨ ਵਿਚ ਮਜ਼ਦੂਰ ਸੀ ! ਉਸ ਨੇ ਭਾਪ ਤੋਂ ਚਲਣ ਵਾਲੇ ਇੰਜਣ ਦਾ ਸੁਪਨਾ ਵੇਖਿਆ ਅਤੇ ਉਸਨੂੰ ਸਾਕਾਰ ਕੀਤਾ , ਜਿਸ ਨਾਲ ਰੇਲ ਗੱਡੀ ਹੋਂਦ ਵਿਚ ਆਈ ਤੇ ਪੂਰੇ ਸੰਸਾਰ ਦੀ ਆਵਾਜਾਈ ਪ੍ਰਣਾਲੀ ਵਿਚ ਕ੍ਰਾਂਤੀ ਆ ਗਈ! ਥਾਮਸ ਐਲਵਾ ਐਡੀਸਨ ਦਾ ਬੱਲਬ,  ਅਲੈਗਜ਼ੈਂਡਰ ਗ੍ਰਾਹਮ ਬੇਲ ਦਾ ਟੈਲੀਫੋਨ,  ਕਿੰਗ ਕੈਂਪ ਜਿਲੇਟ ਦਾ ਬਲੇਡ ਅਤੇ ਹੋਰ ਵੀ ਇਹੋ ਜਿਹੀਆਂ ਖੋਜ਼ਾਂ ਸੁਪਨਿਆਂ ਦਾ ਹੀ ਨਤੀਜਾ ਹਨ!